« Novas

As competicións de dornas cobraron protagonismo neste primeiro fin de semana da Festa do Marisco, reunindo embarcacións procedentes de distintos puntos da ría.

Onte, sábado, celebrouse a Regata de dornas “a vela” da Festa do Marisco, que contou coa participación de dezaoito embarcacións chegadas desde A Illa de Arousa, Cambados, Ribeira, Muros e do propio Grove. Na proba participaron, entre outros, os Dorneiros Regateiros, A Torre, o Clube Mariño Salnés e ACD Dorna. As boas condicións meteorolóxicas da tarde permitiron a celebración da regata, nunha xornada na que as dornas navegaron polas augas da ría e na que se puxo de novo en valor esta embarcación tradicional.

Hoxe, domingo, foi a quenda para a celebración do Desafío Arousa coa regata de dornas "a remo” da Festa do Marisco, organizada polos Amigos da Dorna Meca. A competición reuniu embarcacións procedentes de Cambados, A Illa de Arousa e O Grove. A vitoria nesta segunda xornada foi para os cambadeses, que se impuxeron no desafío a remo.

Dúas xornadas que volveron converter as dornas nun dos puntos de interese da programación da Festa do Marisco.