« Novas

O Grove entregará, no marco da Festa do Marisco, catro novas Centolas de Ouro, a máxima distinción que concede o Concello e coa que se recoñece a aquelas persoas e entidades que exercen como bos embaixadores da localidade. O Consello Local de Turismo decidiu nesta ocasión distinguir dous perfís individuais e dous colectivos: o deportista Antonio Devesa Pérez “Tolín”, a exvicepatroa da Cofradía do Grove Lola Gondar, o establecemento El Moderno e o ForoAcui. Catro traxectorias moi diferentes que o CLI decidiu premiar tras valorar distintos nomes.

Antonio Devesa “Tolín” é un veterano deportista do club Breogán cunha longa vinculación ás disciplinas acuáticas. Nado en 1956, desenvolveu a súa carreira deportiva no remo, o piragüismo e o barco dragón, con boa parte da súa traxectoria ligada ás traineras do Clube de Remo Mecos.

Aos seus setenta anos, continúa en activo. Combina o remo no C.R. Virxe da Guía, co que este ano logrou o título de campión da Liga Galega de Traíñas Veteranas e o de campión de España de Traíñas Veteranas, coa participación no barco dragón das Centolas. Nesta modalidade acadou seis títulos de campión de España e unha medalla de bronce, ademais de pechar a tempada como subcampión da Liga Nacional de Barco Dragón.

Tamén será recoñecido El Moderno, que este ano cumpre cen anos de historia. O negocio familiar de comida para levar, situado na rúa Castelao, iniciou a súa actividade en 1926 da man da familia Prol Domínguez. O inmoble ofrecía inicialmente habitacións para aloxar turistas e, posteriormente, incorporou un restaurante de comida caseira para os seus clientes.

Catro xeracións despois, as irmás Mari e María José Piñeiro decidiron transformar parte do antigo restaurante nun despacho de comidas que continúa mantendo hoxe moitas das receitas dos seus antepasados.

A exvicepatroa da Cofradía do Grove, Lola Gondar, é outra das galardoadas. Posuidora dun Premio Meca, foi responsable da agrupación de mariscadoras a pé durante vinte anos e estivo á fronte do pósito durante varios mandatos, desenvolvendo un papel moi relevante.

O ForoAcui completa a lista de recoñecementos. Considerado toda unha institución no ámbito galego, foi creado en 1998 baixo o nome de Foro dos Recursos Marinos e Acuicultura das Rías Galegas, co obxectivo de converterse nun espazo de referencia para comunicar a realidade e as perspectivas de futuro da pesca, o marisqueo e a acuicultura en Galicia.

Case tres décadas despois, o foro consolidouse como un importante punto de encontro no que se analizan os retos presentes e futuros do sector do mar. Celebrado cada ano no marco da Festa do Marisco, reúne a centos de científicos e investigadores que aproveitan esta cita para compartir os seus proxectos. A edición deste ano terá lugar os días 1 e 2 de outubro no auditorio municipal.

A entrega das catro Centolas de Ouro terá lugar nunha gala que se celebrará o venres 9 de outubro, ás oito da tarde, no auditorio municipal.